2019 წლის 27 მარტს, თეატრის საერთაშორისო დღეს, რეაბილიტაციის შემდეგ, საზეიმოდ გაიხსნა ბათუმის ილია ჭავჭავაძის სახელობის პროფესიული სახელმწიფო დრამატული თეატრის შენობა პრემიერით „KLDIASHVILI.GE #იმედითადამოთმინებით“(რეჟ. ანდრო ენუქიძე).

თეატრის სარეაბილიტაციო სამუშაოები 2014 წელს დაიწყო და ფონდი „ქართუ“–ს მიერ 14,5 მლნ. ლარით დაფინანსდა. საზეიმო გახსნას ესწრებოდა საქართველოს პრეზიდენტი სალომე ზურაბიშვილი, პრემიერ–მინისტრი მამუკა ბახტაძე, აჭარის ა.რ. უმაღლეს საბჭოს დავმჯდომარე დავით გაბაიძე, აჭარის ა.რ. მთავრობის თავმჯდომარე თორნიკე რიჟვაძე, საქართველოსა და აჭარის ა.რ. მთავრობის კაბინეტის წევრები. საზეიმო გახსნაზე აგრეთვე მოწვეული იყო საქართველოს პროფესიული თეატრების მოღვაწეები, საზოგადოების წარმომადგენლები და სხვა. დამსწრე საზოგადოებას სიტყვით მიმართა ბათუმის დრამატული თეატრის სამხატვრო ხელმძღვანელმა ანდრო ენუქიძემ. დასასრულს მაყურებელმა იხილა საპრემიერო სპექტაკლი „KLDIASHVILI.GE #იმედითადამოთმინებით", ხოლო რამოდენიმე დღეში გაიმართა მორიგი საპრემიერო ჩვენება, ავქსენტი ცაგარელის „ხანუმა“. ორთავე სპექტაკლის რეჟისორი გახლავთ ბათუმის დრამატული თეატრის სამხატვრო ხელმძღვანელი ანდრო ენუქიძე.

ბათუმის დრამატული თეატრი იძენს ახალ სიცოცხლეს, მინდა ყველა ბათუმელს და მთელ საქართველოს მივულოცო დღევანდელი დღე, - ამის შესახებ საქართველოს პრემიერ-მინისტრმა მამუკა ბახტაძემ ბათუმში, რესტავრირებული ილია ჭავჭავაძის სახელობის პროფესიული სახელმწიფო დრამატული თეატრის გახსნაზე სიტყვით გამოსვლისას განაცხადა.

მთავრობის მეთაურმა თეატრის რესტავრაციისთვის ფონდ "ქართუს" მადლობა გადაუხადა და აღნიშნა, რომ ბათუმის თეატრი ყოველთვის განსაკუთრებული როლით გამოირჩეოდა ქართული თეატრის ისტორიაში.

"ეს არის მართლაც განსაკუთრებული შემთხვევა. დღევანდელი დღე განსაკუთრებით მინდა მივულოცო აქ მოღვაწე საზოგადოებას, ყველა თაობის რეჟისორსა თუ მსახიობს და რა თქმა უნდა, თქვენს ერთგულ მაყურებელს. შენობა აღდგენილია ისე, რომ შენარჩუნებულია ყველა ისტორიული ნიუანსი, უნიკალური მხატვრობა, უნიკალური ჭაღები და კოლონები. ეს ყველაფერი გააკეთა ფონდმა "ქართუმ". განსაკუთრებული მადლობა მინდა გადავუხადო ქართული თეატრისა და ზოგადად, ქართული კულტურის გულშემატკივარს, ბიძინა ივანიშვილს ამ დახმარებისთვის. ბათუმში თეატრის ისტორია იწყება 19-ე საუკუნის 70-იან წლებიდან. ის ყოველთვის თავისი უნიკალური ხელწერით გამოირჩეოდა და ძალიან მნიშვნელოვანია, რომ ეს ტრადიციები გაგრძელდეს. განახლებული ბათუმის თეატრი საშუალებას მოგცემთ, სრულფასოვნად და მთელი ძალით წარმოაჩინოთ ქართული ხელოვნების პოტენციალი. მე ძალიან მიხარია, რომ თქვენთან ერთად სხვა მსოფლიო დასებსაც ექნებათ საშუალება, მონაწილეობა მიიღონ ქალაქის კულტურულ ცხოვრებაში. ეს კიდევ უფრო ხაზს გაუსვამს ბათუმის, როგორც ფესტივალების ქალაქის სტატუსს. კიდევ ერთხელ მინდა მივულოცო ქართული თეატრის და ზოგადად, ქართული კულტურის გულშემატკივრებს", - განაცხადა მამუკა ბახტაძემ.

ბათუმის ილია ჭავჭავაძის სახელობის პროფესიული სახელმწიფო დრამატული თეატრის რეაბილიტაცია ფონდ "ქართუს" მიერ 14,5 მლნ. ლარით დაფინანსდა.

გარდა შენობის რესტავრაციისა, თეატრში დამონტაჟდა განათებისა და გახმოვანების თანამედროვე სისტემები, სცენის ახალი მექანიზმები და თანამედროვე სადადგმო ტექნოლოგიები, რაც საშუალებას მისცემს დასს განახორციელოს ყველაზე თამამი ექსპერიმენტები და უმასპინძლოს მსოფლიო დონის თეატრალურ დასებს. შენობაში არსებული დიდი და მცირე სცენა პარალელურ რეჟიმში სხვადასხვა წარმოდგენის გამართვას შესაძლებელს გახდის.

თეატრი გათვლილია 483 მაყურებელზე და ადაპტირებულია შშმ პირებზე.

მიმდინარე წლის 18 სექტემბრიდან 9 ოქტომბრის ჩათვლით თბილისი რიგით მე-9 საერთაშორისო თეატრალურ ფესტივალს მასპინძლობდა. ფესტივალის ფარგლებში მოეწყო ბაზრობა–შეხვედრა ე.წ. „შოუქეისი“. ქართული სპექტაკლების პროგრამაზე მოწვეული იყო 80–მდე საერთაშორისო სტუმარი. "შოუქეისზე" ბათუმის დრამატულმა თეატრმა წარმოადგინა თეატრის რეპერტუარში არსებული სპექტაკლების ბეჭდური და მულტიმედიური მასალა, რომელიც დაინტერესებულ სტუმრებს საჩუქრად გადაეცათ სპექტაკლების გაცნობის და შემდგომი ურთიერთობის გაღრმავების მიზნით.

სტუმრებმა დიდი ინტერესი გამოხატეს ჩვენი თეატრის მიმართ. მოხდა კონტაქტების გაცვლა. დაისახა მომავალი პროფესიული ურთიერთობებისა და თანამშრომლობის პერსპექტივები.

ბათუმის ილია ჭავჭავაძის სახელობის სახელმწიფო პროფესიული დრამატული თეატრი ოფიციალურად მხარდამჭერი გახდა საქველმოქმედო ფონდ "ოცნება"-ს. კერძოდ, სხვადასხვა ღონისძების და სპექტაკლის დროს უსასყიდლოდ გადაეცემა ფონდს დრამატული თეატრი და 'სცენა", ასევე მსახიობები მასტერკლასს ჩაუტარებენ სკოლის მოსწავლეებს. ფონდი კი ჩაერთვება პროექტში "მე მიყვარს თეატრი", რომელიც გულისხმობს სკოლის მოსწავლეების და სტუდენტების ჩართულობას.

2016 წლის 23 აპრილს ბათუმის ილია ჭავჭავაძის სახელობის სახელმწიფო დრამატულ თეატრსა და ბათუმის საზღვაო ნავსადგურს შორის გაფორმდა ურთიერთთანამშრომლობის მემორანდუმი.

მემორანდუმი ითვალისწინებს შემოქმედებითი განათლებისათვის აუცილებელი მატერიალურ-ტექნიკური რესურსების ეფექტურ გამოყენებას; შემოქმედებითი და ტექნიკური პროექტების ერთობლივ განხორციელებას. მემორანდუმის საფუძველზე მხარეები აწარმოებენ შეთანხმებულ პოლიტიკას ერთობლივი პროექტების მომზადების, განხორციელებისა და აუცილებელი რესურსების მომზადების მიზნით; მხარეები გამოიყენებენ ერთმანეთის მატერიალურ-ტექნიკურ და ინტელექტუალურ რესურსებს მემორანდუმის მიზნების მისაღწევად; გაუწევენ ერთმანეთს კონსულტაციებს, განახორციელებენ ერთობლივ სასწავლო - შემოქმედებით პროექტებს; ჩაატარებენ ერთობლივ სიმპოზიუმებს, ფესტივალებს, კონკურსებს, სემინარებს, კონფერენციებს და ასევე სხვადასხვა სახეობის ერთჯერად შემოქმედებით პროექტებს. მემორანდუმი არ ზღუდავს პარტნიორობის სახეებსა და ფარგლებს. მხარეებს შეუძლიათ ითანამშრომლონ სხვა საკითხებში ორმხვრივი ინტერესების შესაბამისად.

ბათუმის ილია ჭავჭავაძის სახელობის სახელმწიფო დრამატული თეატრი იმედს გამოთქვამს, რომ ზემოაღნიშნული მემორანდუმი არაერთი მნიშვნელოვანი კულტურული და საგანმანათლებლო პროექტების განხორციელების საშუალებას მისცემს მხარეებს